MI EXTREMAURA

 MI EXTREMAURA

¿Qué tieni mi Extremaúra,
qué tieni la nostra tierra
que se isparan töas las ansias
¡juy!... cuando d’ella t’alejas?...

Al palral cuandu estoy lejus
er llantu a mis ojus llega
y tó er rostru me lo moja
lo mesmo que llúvia juera.




Los sentíus me se quiebran
jaciendo que se estremezan
töas las carnis de mi cuerpu
y la sangri de mis venas.

Me crugin tos los adentrus
y el arma me se menea
pa hacia arriba y pa hacia abaju
y hasta me queo sin juerzas.

Son sus campus, sus encinas,
es er verde de las jesas,
sus cantuesus y madroñas,
la culó de primavera,
sus alcolnoquis y jaras,
las oloris de la tierra
cuando las floris adornan
de amarillo, rojo y fresa,
las orillas de regatus
que entre alcoris se manejan.

Es el espinu, el romeru,
que s’arrejuntan y enréan
con er fresno, alíseo y brezu
como si abrazus se dieran.



Son las estrellas d’er cielu
cuandu en la nochi lucean
con los brillos d’er diamanti
paiciendu que tiritean.

Los venäos que de los montis
s'abajan y pastorean
metíos entre er boscaje
y las encinas mas nuevas.

Los sus coloris me parecin
salíus de la paleta
d’er más famosu pintó
que pintó naturaleza.

¿Y sus jermosas mujeris
con sus linajes de jembras
mezcla d’ encina y de rosa?...
Si te quierin te se entregan
con er corazón, con su arma,
con töa su pasión y juerza,
llenándot’er cuenco de savia
de la mejó… de la güena.

Los recuerdus de su historia,
adentru me jormiguean
y me jablan de aventuras
de gentis que en timpus jueran
valerosus conquistaores
de otras gentis y otras tierras
amasandu pa la Pátria
gloria, poer y grandeza
y pa la nuestra Extremaúra
una jartá de nobleza.

To esto tié mi Extremaúra…
y mil joras yo estuviera
sin contal apenas ná,
palrando y palrando d’ella.
                                            J.J.Romero Montesino-Espartero